BAGUIO CITY – Nangibulos iti rinibribo a tilapia fingerlings ti City Veterinary and Agriculture Office ti Baguio sadiay Wright Park Lake ken iti dadduma pay a napili a barangay ditoy siudad idi agsapa kalman kaggidan iti selebrasyon ti Farmers and Fisherfolk Month ta a bulan ti Mayo.
Sigun kenni City Veterinarian Dr. Brigit Piok, dumanon iti 23,000 a fingerlings wenno bin-i a tilapia ti inbulosda iti Wright Park Lake ken kadagiti barangay iti siudad nga addaan ti fishponds ken natural springs kas sadiay Happy Hollow, Lucnab, Camp 7, Irisan, Atok Trail ken Santo Tomas Central.
Dinakamatna a nagtaud dagiti bin-i a lames manipud iti Bureau of Fisheries and Aquatic Resources – Cordillera.
Mangnamnamada met a babaen iti nasao nga addang ket ad-adda a magbiag ti Wright Park Lake ken mapapintas pay ti buya ti nasao a pagpasyaran a maysa kadagiti daydaywen dagiti turista.
Iyap-apela pay ni Dr. Galpo kadagiti umili, nangruna kadagiti agturturong sadiay ti saanda a panangpakan iti nagduduma a taraon kadagiti tilapia tapnu saan a matay dagitoy.
Imbinglayna a panggepda nga ipalubos ti panagbanniit iti Wright Park Lake iti kanito a dumadakkel dagiti tilapia para iti recreational purposes ken kanayonan a tourist attraction ti siudad.
