BAGUIO CITY – Nakemmeg ti maysa a high value target a drug personality iti anti-illegal drug operation nga insayangkat dagiti otoridad sadiay San Julian, Tabuk City, Kalinga.
Nabigbig daytoy a ni Pinklon Floyd Balinag alyas Martin Balinag, 30-anyos, naasawaan, electronics technician ken residente ti San Julian, Tabuk City, Kalinga.
Naisayangka ti transaksion ti buy-bust operation iti uneg ti lugan ni Balinag.
Nupay kasta, kinuna ti pulisya a kabayatan ti transaksion ni Balinag ken ti operatiba a nagserbi a poseur buyer ket nadlaw ni Balinag ti presensya dagiti otoridad isut gapuna a ginandat daytoy a naglibas.
Nakemmeg metlaeng ni Balinag babaen kadagiti nangkamat kenkuana a kameng ti operating team.
Nakumpiskar kenkuana ti 14 a pakete ti mapapati a shabu nga addaan pakabuklan a dagsen a 25 a gramo nga aggatad ti mapattapatta a P170,000.
Nakumpiskar pay kenni Balinag ti 24 a pidaso ti nagduduma a bala ken sumagmamano a drug paraphernalia.
Iti agdama, sumangsango ti drug personality kadgiti kaso a panaglabsing iti Comprehensive Dangerous Drugs Act of 2002 ken Comprehensive Firearms and Ammunition Regulation Act.
