BAGUIO CITY – Sumangsangon iti kaso a panaglabsing iti RA 9165 wenno iti Comprehensive Dangerous Drugs Act of 2002 ti tallo a drug personalities kalpasan a natiliw dagitoy iti nagsisina a buy-bust operations ditoy Baguio City itay laeng nabiit.
Immuna a nakemmeg sadiay Lower Cabinet Hill ni Kurt Justin Guttierrez Facullo alyas Kurt Justine Fakunio, 30-anyos, maysa a call center agent.
Nakumpiskar kenkuana ti maysa a pakete ti maatap a shabu nga aggatad ti P3,500 ken narekober iti ikotna ti naaramat a buy-bust money.
Simmaruno a natiliw iti kapada nga operasyon sadiay Santo Rosario Valley ti High Value Individual a ni Limel Nico Siloy San Pedro.
Nakumpiskar kenkuana ti maysa a gramo ti kadagsenna a maatap a shabu nga aggatad ti P6,500 ken ti cellphone nga inaramatna iti transaksionda iti operatiba bayat a narekober iti ikotna ti naaramat a buy-bust money.
Natnag pay iti ima ti linteg ti gwardia a ni Ferdinand Balleza Bulao, 37-anyos ken residente ti Balsigan, Baguio City kalpasan a nakumpiskar kenkuana ti maatap a shabu nga aggatad ti P3,400.
Nakumpiskar pay manipud iti ikotna ti sumagmamano nga illegal drug paraphernalia ken narekober ti naaramat a buy-bust money.
