![](https://img.bomboradyo.com/baguio/2021/08/covid-update.jpg)
BAGUIO CIY – Nailista ti siudad ti Baguio ti 91 nga ipupusay gapu iti COVID-19 iti las-ud laeng ti 17 nga aldaw manipud Oktobre 1 agingga Oktobre 17.
Daytoy ket iti baet dagiti aksion ti siudad tapnu makontrol ti panagngato ti kaso ti COVID-19 a pakpakaruen ti Delta variant.
Maibasar iti datus ti UP Baguio Department of Mathematics and Computer Science ken ti Baguio City Health Services Office, 22 kadagiti pimmusay ti karaman iti 50-59 years old age group bayat a ti 21 ket iti 70-79 years old age group.
Nailista metlaeng ti maysa nga ipupusay gapu iti COVID-19 iti 0-9 years old age group.
Naamuan pay a manipud kadagiti pimmusay ket 71 ti saan a nabakunaan kontra iti COVID-19 bayat a 17 ti naan-anay a nabakunaan a kaaduanna ket iti 60-89 years old age group ken ti nabati a tallo ket nakaawat ti umuna a bakuna.
Maipalagip a nailista ti Baguio ti kangatuan a bilang ti ipupusay gapu iti COVID-19 idi napalabas a bulan ti Setyembre a dimmanon iti 136.
Ti agdama a panagngato ti kaso ti COVID-19 iti siudad ket intunda ti Delta variant ken ti maikapat a panagngato ti kaso ti nasao a sakit manipud nakastrek ti pandemya iti siudad.