Naituding a maideploy dagiti 9,731 a pulis para iti parliamentary elections idiay Bangsamoro Autonomous Region in Muslim Mindanao (BARMM) inton Oktubre 13,2025.
Sigun kenni Philippine National Police Chief PGen. Nicolas Torre III nangrugi a naideploy dagiti dadduma a pulis kadagiti sumagmamano a lugar kas paset ti panagsagana iti nasao nga eleksyon.
Nangrugi metten a naipatungpal ti gun ban iti nasao a lugar idi Agosto 14 aginggana inton Oktubre 28, 2025.
Kabayatanna, sigun iti Commission on Elections, 94 manipud kadagiti 108 a lugar idiay Bangsamoro ti naibilang kas election areas of concern bayat a 29 ti naipasidong iti red category.
Malaksid iti dayta, dua metlaeng a lugar sadiay ti naipasidong iti Comelec Control.
Iti baet dayta, impasigurado dagiti pulis a babaen iti pannakaideploy dagitoy ket maipasigurado ti kinatalna ken balligi nga eleksyon.
