BAGUIO CITY – Nasitar ken naipaayan ti citation ticket ti maysa a lugan kalpasan a naduktalan ti colorum a panagbiahe daytoy iti naisayangkat a checkpoint sadiay Irisan, Baguio City idi kanikadua.
Sigun kenni PCapt. Tristan George David, dadaulo ti BCPO-Station 9, ti nasao a lugan ket maysa a van nga addaan plaka nga WBU 669 ken agmaris iti silver nga imanmaneho ni Russel Lacar Agag, 41-anyos ken residente ti Pagudgud, Ilocos Norte.
Kinunana a manarimaan ti panag-checkpoint dagiti pulis idi pinarada ti van.
Iti panagsukimat dagiti pulis, naduktalanda a nagtaud sadiay Ilocos Norte ti van ken paturong ditoy siudad tapnu itulod ti 10 a pasaherona.
Natikitan ni Agag kalpasan a napaay a mangipakita ti dokumento a mangpaneknek a mabalin daytoy nga agibiahe kadagiti pasahero.
Napalubusan met dagiti pasahero a sumrek iti siudad kalpasan a nakita a kompleto dagiti dokumento dagitoy.
Sigun pay kenni PCapt. David, manipud Enero 1 agingga ita nga aldaw ket dumanon iti 12 a lugan ti natikitanda gapu iti colorum operation dagitoy nga intunda ti pananggandatda a mangiserrek ditoy siudad kadagiti pasaheroda manipud lowlands.
Innayonna a napalagipan dagiti maseknan a drivers ken naballaaganda a no matiliwda manen ket maireport dagitoy iti LTO para iti kaskenan nga aksion kas iti panakakanselar ti prangkisa ti lugan ken panaka-impound ti lugan.
