LA TRINIDAD, BENGUET- Dumanonen iti 883 a kaso ti dengue ti nailista iti probinsya ti Benguet manipud Enero a uno agingga Hunyo a syete iti agdama a tawen, kas maibasar iti kaudian a datos ti Provincial Epidemiology and Surveillance Unit ti Provincial Health Office.
Maibasar iti datos, ti munisipyo ti Itogon ti nakailista iti kaadoan a kaso ti dengue a dumanon iti 245, sarunoen ti munisipyo ti La Trinidad nga addaan iti 135 a kaso ken ti Tublay nga addaan iti 114 a kaso.
Ti munisipyo ti Atok ket nakailista iti 39 a kaso ti dengue, Bakun a 20 a kaso, Bokod nga 18 a kaso, Buguias nga 87 a kaso, Kapangan nga 87 a kaso, Kibungan nga 18 a kaso, Mankayan a 65 a kaso, Tuba a 31 a kaso ken ti kababaan a munisipyo a nakailista iti kaso ti dengue ket ti Sablan a dumanon iti pito.
Manipud Hunyo a uno agingga Hunyo a syete ket dumanon iti 49 a kaso ti baro a nailista.
Gapu iti dayta, makikiddaw ti panagbalin a naridam ti publiko ken panagkita a nadalus ti aglawlaw dagitoy tapno maliklikan ti anyaman a sakit kas iti dengue.
