LA TRINIDAD, BENGUET – Panggep ti Local Government Unit ti La Trinidad, Benguet babaen iti Municipal Environment and Natural Resources Office a makontrol dagiti air pollutants iti nasao a munisipyo babaen iti panagmula dagitoy iti kayo iti igid ti kalsada sadiay.
Iti panakiuman ti Bombo Radyo kenni Arthur Pedro, Administrative Officer V iti La Trinidad Municipal Environment and Natural Resources Office, nakuna daytoy a naimula dagiti 50 nga Eugenia Tree sadiay sentro ti nasao a munisipyo partikular iti sanguanan ti municipal hall agingga sadiay 2nd gate ti Benguet State University wenno sadiay BSU marketing.
Sigun ni Pedro a ti nasao a klase ti kayo ket agserbi kas buffer wenno pollutant absorber manipud kadagiti lugan a maidaldalyasat iti paset ti national hallway.
Innayonna nga idi napalpalabas ket adda metlaeng dagiti Eugenia Tree a naimula iti nadakamat a paset ti kalsada.
Nupay kasta, naobserbaran dagitoy nga adda paylaeng dagiti espasyo a nawaya wenno available isunga nagmulada ulit.
Impeksa daytoy nga adda ti nakitada iti masakupan ti siyudad ti Baguio nu sadino ket nasedsed ti pannakaimula ti Eugenia tree isu’t gapuna nga isu met ti aramiden dagitoy.
Mangnamnama daytoy a babaen iti nasao nga addang ket mas ma control pay dagiti air pollutants sadiay.
