BAGUIO CITY – Umap-apela ti lokal a gobyerno ken health authorities iti nainget a parental supervision kasaruno ti nailista a dua a kaso ti fireworks-related injuries iti Baguio City manipud Disyembre 21 agingga Disyembre 22.
Dagiti biktima ket dua a lalaki, agtawen iti 11 ken 12 nga agpada a nagsagrap iti blast ken burn injuries iti ima ken braso.
Napasamak ti insidente iti residential areas idiay Lower Dagsian ken Irisan.
Iti umuna nga insidente, mismo a ti biktima ti nag-iggem ken nagsindi iti paputok partikular ti illegal “5-star” firecracker a nagresulta iti nail avulsion ken burns.
Iti maika-dua nga insidente, saan pay a nabigbig ti klase ti device nga inaramat ti biktima a nangitunda iti second-degree chemical burns rason a kasapulan a maipasidong ti biktima iti surgical debridement.
Gapu iti daytoy, inyunay-unay ti lokal a gobyerno a nasken a bantayan dagiti nagannak dagiti ubbing tapno saanda nga ag-iggem iti aniaman a klase ti paputok.
Kiniddawda metlaeng kadagiti awtoridad a mas ingetanda pay ti operasyonda kontra iti iligal nga aglaklako iti 5-star ken dadduma pay a maiparit a pyrotechnics kadagiti babbarangay iti siudad.
Binallaaganda pay ti publiko a liklikanda ti personal a panagaramat iti fireworks nu di ket mabalin a makipaset ken agbuya kadagiti authorized community fireworks displays.
Iti agdama ket agtultuloy nga aktibo ti 2025 FWRI Surveillance ken maguyguyogoy ti publiko nga i-report ti aniaman a fireworks-related injuries babaen iti QR code reporting system ti siudad.
