Kagiddan ti panangmarka ni Senator Ronald “Bato” dela Rosa iti maika-64 a panagkasangayna idi kalman ket ti panangipablaakna iti mensahe na iti Facebook page daytoy mainaig iti kasasaadna ken iti pakaseknan maipapan iti maatap a panangipaiyulog iti International Criminal Court(ICC) ti warrant of arrest kontra kenkuana.
Iti statement ni Senator dela Rosa, impatalgedna nga “alive and well” daytoy iti agdama ngem saannan a dinakamat ti lokasyonna.
Impettengna metlaeng a saanna nga itulok a gangganaet a korte ti mangtingiting iti kasona nu di ket korte iti Pilipinas ken iti sangwanan dagiti kakailyanna a Pilipino.
Kagiddan dayta, agtaltalinaed ti panangidepensana nga addaan daytoy iti dignidad ken patriotism.
Maipalagip a sipud nadakamat ti maatap a panangipaiyulog iti international tribunal iti warrant of arrest kontra kenni Senator dela Rosa ket saanen nga immatendar daytoy kadagiti Senate plenary sessions.
Nupay kasta,saan pay a nakumpirmar nu pdno a nangipaiyulogen ti ICC iti warrant of arrest kontra iti nasao a senador.
Iti agdama ket agtultuloy ti panangidagadag kenkuana dagiti kakadwana iti Senado nga agpakita daytoy kadagiti Senate plenary sessions.
Maipalagip a ni Senator dela Rosa ti nagserbi nga hepe iti kapulisan kabayatan ti administrasyon ni sigud a President Rodrigo Duterte nu sadino,maibilbilang daytoy a kangrunaan a nangiyimplimintar kadagiti tignay maitunos iti kampanya kontra iligal a droga ti naglabas nga administrasyon.
