Impetteng ti kapulisan iti rehion Cordillera a maingetan ti pannaka-implementar ti “Oplan Ultimate Grasscutter”, agingga nga awanen ken mapasardeng ti panagmula dagiti Marijuana Cultivators iti probinsiya ti Benguet.
Sigun kenni PMaj. Edwin Sergio, public information officer ti Benguet Provincial Police Office (BPPO) nagtriple ti accomplishment da ita a 1st quarter ti agdama a tawen no idilig idi naplabas a tawen.
Inyebkas pay daytoy a “very alarming” ti situasion, gaputa dagiti sigud nga awanan ti nailista a plantation wenno cultivators ti marijuana a munisipyo ket adaan ita ti marijuana plantation sites kas iti Bokod, Atok ken dadduma pay.
Inlawlawag ni Pmaj Sergio nga iti assessment dagitoy, posible a gapu iti intensified a panaka-implementar ti “Oplan Ultimate Grasscutter” isu’t gapuna a nagbiruk dagiti planters iti dadduma a munisipyo a man-mano a pakadiskubrean ti marijuana plantation sites.
Kabayatanna, inlawlawag ti opisyal nga imbis a kumpiskarenda ti ebidensya kas iti hose, bomba ken dadduma pay a masangsangpetanda kadagiti Marijuana plantation site ad-adda nga ibatbatida dagitoy, karaman ti surat wenno slogan tapnu aramaten dagiti sinuman a cultivator wenno planter ti marijuana para ti panagmulada iti nateng.//Bombo Novey Organo
