Agtultuloy nga irekreklamo dagiti nearby residents ken establishments ti maysa a bar idiay Brgy Burnham -Legarda, Baguio City.
Sigun iti eksklusibo a pannakiuman ti Bombo Newsteam kenni Brgy Chairman Teodoro Castro, ti irekreklamo dagiti residente ken sumagmamano nga establishment ket ti pannakailaylayon ti oras ti operasyon ti nasao a bar, banag a manglablabsing iti Silent Night Ordinance ti siudad ti Baguio.
Agserra kuma daytoy iti alas-dos ngem ag-ex-extend daytoy iti operation hours.
Malaksid iti dayta, napigsa metlaeng ti tukar manipud iti nasao a bar.
Impeksa ti kapitan a namitlon a naaddaan ti tungtungan iti barangay ken iti makinkukua ken personnel ti nasao a bar iti Permits and Licensing ken kapulisan ngem iti baet dayta, adda latta dagiti maaw-awat dagitoy a reklamo manipud kadagiti residente.
Innayon pay daytoy a sigun iti Permits and Licensing Office, nu adda pay dagiti reklamo manipud kadagiti residente seknan iti operation ti nasao a bar, posible a marigatan dagitoyen a makaala ti permit.
Sigun pay kenni Castro, addan ti gundaway a naiparikkep ti nasao a bar iti agarup makalawas no sadino napagtutulagan a mangimuntar dagitoy iti soundproofing. Nupay kasta, agtultuloy latta dagiti reklamo kontra iti nasao a bar.
Kabayatanna, impeksa ti kapitan a babaen iti Barangay Peace and Order Council (BPOC) meetingda iti kapulisan, kiniddaw daytoy ti nainget nga implementasyon ti Silent Ordinance nga isu met ti impanamnama dagiti kapulisan.
Babaen iti daytoy, napabileg metlaeng ti koordinasyon dagiti Barangay Officials ken kapulisan.
Kagidan dayta, mangnamnama met ti nasao nga opisyal a sumurotda kuma iti pagalagadan ti siudad nangruna iti hours of operation ken panangpakapsot iti musika iti alas-10 ti rabii wenno alas-12 ti parbangon. //via Bombo Noveh Organo
