Impanamnama ti Bureau of Fire Protection–Cordillera Administrative Region (BFP-CAR) nga agtultuloy ti panangpapigsa da kadagiti fire stations, fire trucks ken personnel iti rehion tapno mapapintas ti serbisio ken mapapartak ti panangrespondeda iti publiko.
Sigun kenni Fire Superintendent Katherine B. Albino, Chief iti Public Information Section iti Operations Division ti BFP-CAR, adda ti polisiya ti Department of the Interior and Local Government (DILG) a masapul nga rumbeng nga addaan iti fire station ti tunggal munisipyo.
Ibinglayna nga iti rehion Cordillera, ti laeng probinsia ti Abra a saan pay a naan-anay ti panangkompleto kadagiti fire station na, ngem adda metten dagiti proyekto a pannakaibangon kadagitoy a maur-uray a maileppas ken ma-activate tapno mairugi ti operasyon dagitoy.
Mainaig iti suplay dagiti fire trucks, impakaammo ni Albino nga addaanen kadagiti fire trucks dagiti fire stations iti rehion.
Nupay kasta, impaganetgetna a saan laeng a ti kaadda dagiti fire trucks ti rumbeng a kitaen nu di ket masapul metlaeng a maikonsidera dagiti sabali a factor a mangapektar iti panangresponde dagiti bumbero.
Inlawlawagna a masapul a maikonsidera dagiti dalan a pagdalyasatan dagiti fire trucks ken ti klase ti terrain dagiti lugar.
Imbinglayna nga adda dagiti lugar a narigatda a madanon gapu iti kadakkel dagiti fire trucks nangruna kadagiti nailet a dalan kadagiti sumagmamano a komunidad.
Gapu iti daytoy, impakaaamonga agkidkiddaw metten ti ahensya iti national government kadagiti babbasit a fire trucks, nangruna dagiti 4×4 a lugan a kabaelanna a dumalyasat kadagiti narigat a dalan.
Sigun kenkuana, makatulong dagiti babasit a kita iti fire trucks tapno mapapigsa ti kapasidad dagiti fire stations a mangdanon kadagiti lugar a narigat a madanon.
Nu maipapan met iti bilang dagiti personnel, imbinglay ni Albino nga uray adda dagiti fire personnel iti rehiyon, masapul ti ad-addu a personnel tapno maipatungpal dagiti responsibilidad ti ahensya tunggal adda ti uram wenno dadduma nga emerhensya.
Kabayatanna, impakaammona nga agtultuloy ti tinawen a recruitment ti BFP tapno manayunan ti bilang dagiti personnel ken mapapigsa ti kapasidad ti ahensya nga agserbi kadagiti umili ti Cordillera.
Babaen kadagiti nasao a truck ken kanayunan a personnel, namnamaen ti BFP-CAR a mapapintas pay ti panangresponde da kadagiti emerhensia, nangruna kadagiti lugar a narigat a madanon iti rehiyon.// via Bombo Khey Reparip
