Agtultuloy a makaaw-awat iti pammadayaw manipud iti publiko ni Islay Erika Bomogao kalpasan a nabigbig daytoy kas World’s No. 1 iti International Federation of Muay Thai Associations Ranking para iti 45 kilograms female elite athlete.
Impeksa met ni Bomogao ti panagyamanna kadagiti suporta ken talek a naaw-awatna manipud iti kakailyanna, kakabagyanna, pamilyana ken dadduma a tao.
Immunan a nabigbig ni Bomogao kas First Filipina Muay Thai champion kalpasan nga inabakna ni Australia’s Muay Thai state champion Sarah Kwa idiay Kenwick, Australia itay laeng Agosto 10.
Maipalagip a naiyawid ti nasao nga atleta ti bronze medal manipud iti 45-kilogram division ken silver medal manipud iti Muay Thai and Wai Kru events idiay Greece idi laeng napalabas a bulan.
Naibulsana metlaeng ti gold medal iti World Championships idiay Bangkok, Thailand ken silver medal iti Women’s Wai Kru Event World Combat Games idiay Riyadh, Saudi Arabia idi napalabas a tawen.
