BAGUIO CITY – Kinumpirmar ni Emerita Albas, Park Superintendent, nga adda ti agan-anop kadagiti endangered species iti Mt Pulag sadiay Kabayan, Benguet.
Iti interview ti Bombo Radyo, kinuna ni Albas a nakitana mismo nga adda ti agan-anop kadagiti endangered species iti nasao a bantay a kas metlaeng iti nakita dagiti kakadwana ken iti report dagiti turista.
Dinakamatna a kas maibasar iti impormasyon dagiti nakakita, adda dagiti ubbing ken adults a nakaiggem ti airguns nga isu ti ar-aramatenda iti panag-anop ti cloud rats ken wild deers.
Inladawan ni Albas a ti cloud rat ket dakdakkel nu idilig iti regular rat ken adda ti agdagsen iti maysa a kilo.
Inayonna pay nga adda ti dua a klase ti cloud rat, ti maysa ket kadakkel ti rabbit bayat a ti maysa ket bushy tail ken attidog ti ipos na.
Sigun kenni Albas, posible a pangpulutan ti rason iti panag-anop iti nasao a kita ti ayop gaputa kas maibasar iti nabasana a libro ket source daytoy ti protein ken pang-agas pay ti asthma.
Imbinglay ti opisyal a kas maibasar iti panagadal a naisayangkat sangapulo a tawenen ti napalabas ket adda ti sumagmamano a cloud rat sadiay Mt Pulag ngem posible a maib-ibusen daytoy gapu iti mapaspasamak a panag-anop.
Gapu iti daytoy, kidkiddawen manen ni Albas iti publiko ti panang-salwadda kadagiti endagered species tapno adda ti maabutan dagiti sumarsaruno a henerasyon.
