LA TRINIDAD, BENGUET – Simmango iti media ti maysa kadagiti petitioner a nagpirma iti maika-lima a disqualification case kontra kenni Benguet Congressman-elect Eric Go Yap idi kalman.
Daytoy ket tapno ipakaammona nga insanodnan ti pirmana gapu ta sigun kenkuana ket saanna nga ammo a ti pinirmaanna gayam ket petisyon a mangdisdiskwalipikar kenni Congressman Yap.
Sigun kenkuana, idi Mayo 18 ket adda ti naawatna a text message manipud iti maysa a babai nga agnagan iti Hilda a nagpaam-ammo a kameng ti secretariat wenno Headquarter staff ni Tagel Felipe.
Innayonna a kidkiddawen ti nasao a babai ti pirmana para iti attendance.
Saan met a nagdudua daytoy ket napan iti nasao a headquarters.
Nupay kasta, sakbay iti dayta, alas singko ti rabii ket nag-iinomda pay kadagiti kakabagyanna agingga a nagtawag manen ti nasao a babai, alas siete ti rabii a mangibagbaga a nakasaganan ti dokumento a pirmaanna rason a napanen daytoy iti headquarters.
Inaklonna a nupay nakainom daytoy ket pinirmaanna ti inyawatda kenkuana a dokumento nu sadino sigun iti nang-iyawat iti dokumento ket pirmaanna kada page.
Inaklonna pay a saanna a sinukimat ken binasa ti husto a nilaon dagiti pinirmaanna a dokumento gapu ta nagtalek daytoy.
Dinakamatna pay ni Belino nga isuna ti imbagada a naudi a nagpirma isut gapuna a nasken a maikamakam ta masapul a maipatulod idiay Metro Manila.
Kinunana a naklaat laeng daytoy idi naipablaak ti naganna a karaman daytoy kadagiti nagpirma iti naipila a petisyon a mangdisdiskwalipikar kenni Yap.
Gapu iti daytoy, impeksana nga agbabbabawi daytoy rason a nagboluntaryo nga insanudna ti pirmana.
Inyunay-unayna nga awan ti nangpilit, nangiduron, ken nangbayad kenkuana tapno isanodna ti pirmana nu di ket bukodna a desisyon.
Innayonna pay nga ado a pammabalaw ti mabasbasana iti social media ngem impettengna a normal daytoy ken saan a daytoy ti rason iti panangisanudna iti pirmana.
Sigun pay kenkuana, bigbigbigenna dagiti naaramidan ken natulongan ni Congressman Yap iti probinsiya ti Benguet isut gapuna nga agkidkiddaw daytoy iti pammakawan kadagiti kakailyanna nga i-Benguet.
Maipalagip nga idi napan a lawas ket naipablaak iti social media ti kopya ti maika-lima a disqualification case a naipila kontra kenni Congressman Yap nu sadino siyam a petitioner ti nagpirma karaman ni Victor Belino manipud Buguias, Benguet.
Iti agdama ket padpadasen met ti Bombo Radyo nga alaen ti dasig ti sabali a kampo maipapan iti nasao nga isyu.//via Bombo Cara Sacyaten
