Mangrugi a maideploy kadagiti sementeryo iti siudad dagiti kameng ti pulisya iti Baguio City Police Office inton bigat.
Sigun kenni PCol Ruel Tagel, city director ti Baguio City Police Office, napagsaritaan ken napagsaganaanda a nasayaat ti pannakadeploy dagiti pulisya para iti All Souls ken All Saints day.
Pakairamanan kadagiti inaramidda a panagsagana ket ti panagtataripnongda kaduada dagiti local government officials, pannakaipatungpal ti simulation exercises itay agsapa, panagbisita kadagiti sementeryo, terminal ken dadduma pay.
Mainaig iti daytoy, kinunana a manipod iti agarup a 1350 a personnel ti Baguio City Police Office, 520 kadagitoy ti maideploy kadagiti walo a sementeryo iti siyudad bayat a dagiti dadduma ket mangipatungpal kadagiti regular police task dagitoy.
Innayunna pay a gapu ta long weekend daytoy, saan laeng a ti sementeryo ti pakaideployan dagiti pulisya nu di ketdi karaman metlaeng a pakaideployan dagitoy ket kadagiti advance command post, police assistance desk ken dadduma pay.
Kabayatanna, iti agdama, adda iti agarup a 320 a volunteers a kadua dagiti maideploy a pulis ngem dagitoy ket maideploy iti ruar iti sementeryo a mangtulong iti panangimanehar iti gunay ti trapiko.
Impasigurado pay ni PCol Tagel nga umdas ken umno dagiti panagsaganada para iti nasao nga aldaw.
