BAGUIO CITY – Inwaragawag ti Baguio Tourism Council dagiti nakalinya nga aktibidad dagitoy para iti publiko ken kadagiti bisita para iti isasangbay ti “ber” months agingga a madanon ti Paskua.
Idaolwan manen ti BTC Chairperson Gladys Vergara ti panagplano iti mapadpadaan a 2024 “An Enchanting Baguio Christmas” program nu sadino agserbi kas co-chair ni Baguio City Mayor Benjamin Magalong.
Sigun kenni Vergara, umuna nga iorganisa da ti panakabukel dagiti working committees tapno maipanamnama ti naragsak ken naisansangayan a panagpasangbay iti kapatgan a holiday iti taawen, ti panagrambak ti paskua ken panagsarabo ti baro a tawen.
Ipanganetnet na ti kinapateg ti responsible tourism tapno maipanamnama ti seguridad ken kinatalged dagiti sumangbay a bisita ken turista bayat ti panagpasyar da ditoy Summer Capital of the Philippines.
Innayon na a napintas a marambakan ti Paskua a napuan ti ragsak kadwa dagiti miembro ti pamilya ti tunggal maysa nu sadino naituding nga agrugi ti An Enchanting Baguio Christmas intun November 28, 2024 agingga January 6, 2025.//Bombo Jordan Tablac
