BAGUIO CITY – Nasarakan ti bangkay ti maysa a lalaki iti kanal nga asideg iti Nambaran Bridge sadiay Purok Daya, Nambaran, Tabuk City, Kalinga idi kalman.
Nabigbig daytoy a ni Rico Prudenciano, residente ti Asibanglan, Pinukpuk, Kalinga.
Maibasar iti report, nakaawat ti pulisya iti tawag mainaig iti panakasarak ti nasao a bangkay ken iti panagrespondeda ket nadanonda daytoy.
Iti panangiprosesoda iti bangkay, nakita ti tattoo nga agila iti kanigid a gurong, tattoo ti bassit a billit iti kanawan a gurong ken marka nga ‘MCO’ ken ‘SMB BUDOY’ iti kannawan a takyag daytoy.
Nakita pay ti pulisya iti bagi ni Prudenciano dagiti gumriad iti kanigid a siko, bssit a sugat iti kanawan a pispis ken makikita a ligature marks wenno pagilasinan ti panakabekkel iti tengnged daytoy.
Nasarakan pay ti maysa a paris ti nangisit nga slippers, nangisit a kallugong ken rubber a tali a maipada iti marka iti tengnged ni Prudenciano.
Sigun met kenni Kalinga Police Provincial Director, PCol. Davy Vicente Limmong, posible a nabekkel ni Prudenciano agingga a pimmusay daytoy.
Innayonna a posible a naibelleng laeng ti bangkay iti kanal a nakasarakan iti daytoy gaputa awan dagiti nakitada a pagilasinan a sadiay a napasamak ti insidente.
Iti agdama, naiyawiden ti bangkay ni Prudenciano iti pagtaengan dagitoy.
