BAGUIO CITY – Dakkel ti namnama ti Baguio City Police Ofiice a mapababa pay ti krimen iti siudad babaen iti tulong ti baro a tactical operation center a nailukat ita a tawen.
Naaramid ti command center idi napan a tawen ken nailukat laeng kas operational itay nabiit.
Iti panakiuman ti Bombo Radyo kenni PMaj. Harriet Bulcio, panakangiwat ti Baguio City Police Office, naglaon ti command center ti 144 inches video wall, sangapulo ket uppat a monitor, computers ken daduma pay nga alikamen a makatulong iti real-time monitoring ti pulisya iti mapaspasamak a nagduduma nga aktibidad iti siudad.
Naka-connect daytoy iti SMART City command center nga addaan ti 151 a closed-circuit television.
Mainaig iti dayta, kinuna ni PMaj. Bulcio a dakkel ti tulong ti command center para iti napartak nga emergency response dagiti pulisya.
Daytoy ket gapu ta dagiti sangapulo ket uppat a mobile patrols ti opisina ket addaan ti Global Positioning System (GPS) nu sadino maiwanawan metlaeng dagitoy ken makita ti lugar a pagturturonganda iti agdama.
Inlawlawagna a nu siasino ti kaasitgan a lugar nga addaan ti emerhensiya ket dagus a maitawag kadakuada para iti dagus a panagresponde dagitoy uray nu saanda a masakupan ti lugar.
