Naobserbaran ti panagado iti napataud a basura iti Baguio City kagiddan ti holiday season.
Iti panakiuman iti Bombo Radyo kenni Eugene Buyucan, dadaulo iti Baguio City General Services Office, impudnona nga adda dagiti gundaway a maaddaan iti backlog kadagiti basura iti sumagmamano a lugar a pagkolkolektaranda gapu iti nabuntog a gunay iti trapiko a mangituntunda iti panakaitantan ti panagdanon dagiti garbage truck kadagiti naituding a pagkolektaranda.
Nupay kasta, kinuna ni Buyucan a dagus metlaeng a makolektar dagitoy apaman a nawayan a makadalan dagiti garbage truck paturong kadagiti pick up area kadagiti basbasura.
Innayon ti opisyal a saan a mabalin nga ipaturayda a saan makolektar dagiti basura gapu ta pagrebbenganda a kolektarin dagitoy.
Iti baet dayta, umap-apela ni Buyucan iti publiko nga agtulnog kadagiti pagalagadan seknan iti umno a panagibelleng iti basura nangruna iti panangsegregate kadagitoy.
Mainaig iti dayta,aw-awaganna met ti atensyon dagiti agtagikua kadagiti sumagmmano a transient houses iti siudad a kitaenda a naimbag dagiti basuraanda ken saanda itulok nga aglalaok dagitoy.
Kasaruno paylaeng dayta ti naobserbaran a saan a panakaisegregate dagiti basura iti sumagmamano kadagiti nadakamat a klase iti balay pagdagusan ita nga holiday season.//Bombo Rob Dominguez
