BAGUIO CITY – Agtaltalinaed a nababa ti bilang dagiti Persons Deprived of Liberty iti Baguio City Jail Female Dormitory.
Iti interview ni Bombo Jez Lapizar kenni SJO4 Racquel Tengay, Assistant Warden ti Baguio City Jail Female Dormitory, pito pulo ti bilang dagiti balud a babbai iti agdama.
Kaaduan kadagitoy ket sumangsango iti kaso a panaglabsing iti Republic Act 9165 wenno Comprehensive Dangerous Drugs Act of 2002 nu sadino manipud iti pakabuklan a bilang ket agarup tallo pulo ket walo ti naglabsing iti nasao a linteg.
Sigun pay kenni Tengay, awan ti parikut maipapan kadagiti kangrunaan a kasapulan dagitoy gapu ta maipapaay amin ti hygiene kits manipud simrekda iti pagbaludan.
Malaksid iti dayta, adda metlaeng ti tulong nga ipapaay dagiti service providers dagitoy.
Kinuna pay ni Tengay a saanda a naawanan ti suplay ti danum bayat ti El Nino phenomenon ken umdas ti ventilation dagiti dorms.
