BAGUIO CITY – Dumanonen iti tallo ti bilang dagiti nagpositibo iti COVID-19 ditoy siudad ti Baguio.
Maibasar iti datus ti Baguio LGU, dagitoy ket ti 61-anyos a babai nga OFW a nagtaud sadiay Italy, ti 52-anyos a babai a nagtaud sadiay Ortigas ken ti 55-anyos a lalaki a nagtaud sadiay Makati.
Maipalagip a ti kaunaan a pimmusay a kaso ti COVID-19 ditoy siudad ket ti 55-anyos a babai nga empleyado ti gobyerno ditoy Baguio.
Nailista met a presumptive positive COVID ti 31-anyos a lalaki nga agtatrabaho sadiay Makati, ti 49-anyos a lalaki a bus driver manipud Baguio ken ti 23-anyos a lalaki nga agtatrabaho sadiay Ortigas.
Dumanon met iti 259 dagiti persons under investigation (PUIs) a naka-home quarantine bayat a 21 a PUIs dagiti adda kadagiti ospital wenno health facility.
Dumanon pay iti 1, 847 dagiti persons under monitoring a maipaspasidong iti 14-day quarantine bayat a 425 dagiti persons under monitoring a nakakompleto iti quarantine dagitoy.
Kabayatanna, imbilinen ni Mayor Benjamin Magalong ti panakaipasidong ti Barangay Pinget iti total lockdown.
Sigun kenkuana, gapu daytoy iti kinatangken ti ulo dagiti residente saiday iti saanda a panagtulnog kadagiti protocol iti manarimaan nga Enhanced Community Quarantine partikular ti stay-at-home policy iti baet ti panangballaagna kadagitoy.
Innayonna nga adda ti impatulodna a naginspeksion iti nasao a barangay ken sadiay a nakita ti saan latta a panakatungpal dagiti nasao a protocol.
Idi rabii ket naipatungpal ti nasao a lockdown iti Barangay Pinget.
