BAGUIO CITY – Puntirya ti Baguio City Veterinary and Agriculture Office a maka-aramid ti siudad iti bukod daytoy nga strawberry farm.
Sigun kenni Dr. Bridgit Piok, dadaulo ti nasao nga opisina, iti agdama ket adda ti walo a strawberry greenhouse a naibangon ditoy siudad.
Kinunana nga innem sadiay Irisan ken Santo Tomas Central ti pinonduan ti Department of Agriculture iti nasurok kagudwa a milyon a pisos bayat a ti dua sadiay South Drive ken Country Club ket pinonduan ti maysa a pribado a kompanya.
Dinakamatna a manamnama a manayonan iti uppat pay dagiti nasao a greenhouses ti strawberry ngem manarimaan paylaeng ti panagwanawanda kadagiti barangay a mabalin a pakaiyaramidan dagitoy.
Innayonna nga adda ti technical training a naipaay kadagiti napili nga strawberry growers bayat a San Andres ken Sweet Charlie ti variety dagiti strawberries nga inmula dagitoy.
Manamnama a makapataod dagiti greenhouses ti nasurok 7.2 metric tons ti strawberries a makatulong iti tinawen a produksion ti strawberry ditoy siudad ken iti panagbalin ti Baguio nga independent iti suplay ti strawberry.
Kinuna ni Dr. Piok a tarigagayda a mapasayaat ti strawberry farm sadiay Santo Tomas kas agri-tourism site nga agserbi a kanayonan a tourism attraction ti Baguio a mabalin a turongen dagiti turista.
