BAGUIO CITY – Nagballaag ti City Permits and Licensing Division kadagiti establishmento a mangipatpatungpal iti nasikap a taktika ken mangal-allilaw kadagiti kostumer nga isardengdan daytoy tapno saanda a mapatawan iti kaskenan a pannusa.
Kasaruno daytoy ti panangiparikep ti lokal a gobyerno ti Baguio City iti maysa nga establishmento sadiay Kayang St., Barangay AZCKO a maatap a mangal-allilaw kadagiti kostumer.
Sigun kenni City Permits and Licensing Division Chief Allan Abayao, naiparikep itay nabiit ti nasao nga Household Trading Store kasaruno ti rekomendasion ti lokal nga opisina ti Department of Trade and Industry.
Kinunana a ti nasao nga establishmento ket mangididiaya iti libre a payong kadagiti indibidual a lumablabas iti side-walk sadiay kayang.
Apaman a makastrek dagiti kostumer iti nasao nga establishmento ket allilawenda dagitoy babaen iti panangidiayada kadagiti nagduduma a produkto ken freebies agingga a maallilaw dagiti kostumer a gumatang wenno agbayad.
