Agtultuloy ti panangipatungpal iti Baguio City Police Office iti capacity building activity kagiddan ti opisyal nga iseserrek iti nepnep wenno panagtutudo.
Iti panakiuman iti Bombo Radyo kenni Police Colonel Ruel Tagel, City Director iti Baguio City Police Office, karaman kadgiti ipatpatungpalda nga aktibidad ti panagsanay wenno training kadagiti personnel kasta metten ti regular nga inspection kadagiti kagawaan a maaramat iti panagresponde iti panawen iti emerhensiya.
Sigun kenni PCol. Tagel, addan dagitoy iti umdas a manpower a mabalin nga agresponde ngem kagiddan dayta, masapol metlaeng a kitaenda nu adda dagiti umno a kagawaan a mabalinda nga aramaten.
Mainaig iti dayta,manarimaan metlaeng ti close coordination dagitoy kadagiti kameng iti lokal nga opisina iti Disaster Risk Reduction and Management.
Innayon ni PCol. Tagel a saan metlaeng mapukaw ti koneksyonda iti publiko, kasta metten ti nasapa a panangipaay iti ballaag.
Maipalagip nga idi laeng May 30, opisyal nga indeklara iti state weather bureau ti panagrugi iti Habagat wenno Southwest Monsoon nu sadino, kasaruno dayta, ket nangrugi metten ti rainy season.
Manamnama met ti panagrugi ti iseserrek dagiti bagyo iti masakupan iti Pilipinas a mabalin nga agpangta iti seguridad ken kinatalged ti publiko.//Bombo Rob Dominguez
