Sidadaan ti Commission on Elections (Comelec) a mangipaulog iti resolusion a mangpilit kadagiti kandidato a senador a tumabuno kadagiti debate nga inorganisar ti media organizations ken dadduma pay a grupo tapno masigurado ti agpapada a panagpakita dagiti innem a pulo ket innem a kandidato iti publiko.
Sigun kenni Comelec chairperson George Garcia, saan a ti Commission on Elections ti mangisayangkat ti debate ken makibiang, ngem impasigurado ti nasao nga ahensia nga agbalinda a patas kadagiti amin.
Inyunay-unayna kadagiti kandidato nga iti kanito a mangipaulogda iti guidelines ket kasapulan nga agtulnogda gaputa adda ti kaskenan a pannusa a maipataw kadagiti aglabsing.
Kabayatanna, indagadagna kadagiti media outfits a siguraduenda a makipaset dagiti kandidato no planoda ti mangisayangkat iti debate para iti kina-Senador para iti 2025 elections.
Maipalagip nga idi tawen 2022, kidkiddawen ni Comelec Commissioner Garcia ti Kongreso a mangipasa iti linteg a mangikalikagum kadagiti kandidato iti presidente a tumabuno kadagiti debate iti tunggal eleksion, ken innayonna a rumbeng nga adda ti kaskenan a pannusa kadagiti saan a makipaset.
