Imbilin ti Office of the Ombudsman kenni Vice President Sara Duterte ken kadagiti siyam pay a personnel ti Department of Education ken iti Office of the Vice President a sungbatanda ti kaso nga impila ti kongreso kontra kadakuada maipapan iti saanda nga umno a panangusar iti confidential funds.
Impaayan laeng ti Ombudsman ni Duterte ken dagiti siyam pay a kadwana iti sangapulo nga aldaw a mangipila iti counter-affidavit pakairamanan ti affidavit of witness ken dadduma pay a dokumento dagitoy.
Impetteng ti Ombudsman a ti saan a panangisumitir iti counter-affidavit iti naituding a panawen ket maibilbilang a panangiwaksi dagiti respondent iti karbenganda nga agbiruk iti ebidensiya ken agtuloy latta ti imbestigasyon kas nakalanad iti linteg.
Innayon pay ti Ombudsman a saanda nga awaten ti aniaman a mosyon para iti dismissal wenno motion for bill of particulars.
Karaman kadagiti reklamo nga impila ti Kamara itay nabiit ket ti plunder, technical malversation, falsification, panagaramat iti peke a dokumento, perjury, bribery, corruption of public officers, betrayal of public trust, ken culpable violation of the Constitution.
Naipila dagitoy a reklamo kalpasan nga inrekomendar ti House Committee on Good Governance and Public Accountability a makasoan ni Duterte gapu iti mapapati a saan nga umno a panang-usarna iti P500 milyon a confidential fund ti Office of the Vice President ken ti P112.5 milyon a confidential fund ti Department of Education manipud 2022 agingga 2024.
Karaman kadagiti napilaan iti kaso manipud iti DepEd ket da Edward Fajarda ken Gina Acosta (Special Disbursing Officers), Atty. Sunshine Charry Fajarda (Assistant Secretary ken Director for Strategic Management Office), retired Major General Nolasco Mempin (Undersecretary for Administration), ken Annalyn Sevilla (Undersecretary for Finance Service).
Kabayatanna, dagiti met nagtaud iti opisina ti bise presidente ket da Atty. Zuleika Lopez (Undersecretary at Chief of Staff), Lemuel Ortonio (Assistant Secretary at Assistant Chief of Staff), Lt. Col. Dennis Nolasco (Vice Presidential Security and Protection Group), ken Col. Raymund Dante Lachia (Commander, VPSPG, Philippine Army).
Maipalagip a ti isyu iti mapapati a saan nga umno a panangusar iti confidential funds ket maysa kadagiti nadakamat iti impeachment complaint kontra kenni Duterte.
Nupay kasta, impatangken ni Vice President Sara a saan a pudno dagiti akusasyon kontra kenkuana.
