BAGUIO CITY – Mapatta-patta a dumanon iti P4.2-million ti danyos ti nauram a warehouse idiay Avelino Street, Brgy. Andres Bonifacio, Baguio City idi agsapa, Agosto 3.
Iti panakiuman ti Bombo Radyo kenni Janet Tiamzon, Kapitan iti nasao a barangay, 3:15 ti agsapa idi nangngegda ti panagbettak iti uneg ti warehouse.
Agarup 3:50 ti agsapa idi nakitada ti asok nga agtataud iti uneg ti warehouse nu sadino dagus nga inreportda kadagiti kameng ti Bureau of Fire Protection – Baguio.
Dagus a pinapanawda dagiti residente nga asideg iti nasao a warehouse.
Sigun met kenni Senior Fire Office 2 James Ray Agnad, Investigator ti Bureau of Fire Protection – Baguio, posible a ti rason ti uram ket gapu iti electric wirings.
Innayon a dagus a nagramaram ti uram gapu ta daan ken naaramid iti kayo ti uneg ti warehouse.
Maysa met a karit iti panagsebsebda ket ti nakapadlock a pasdek nu sadino saanda a dagus a nakastrek iti uneg.
Kabayatanna, naideklara ti fire out iti oras ti 7:05 ti agsapa.
Mapalpalagipan manen ti publiko nga agbalin a responsable tapno maliklikan dagiti aniaman nga insidente ti uram.//Bombo Jez & Bombo Marinel Rodrigo
