Nangiruar ti Land Transportation Office (LTO) iti panangidaulo ni LTO Chief, Assistant Secretary Markus V. Lacanilao iti show cause order kontra iti driver ti Toyota Hi-Lux a nakadungpar iti 7-anyos a babai idiay Suyo, Ilocos Sur idi Enero 12, 2026.
Daytoy nga aksyon ket naibasar iti administrative investigation nga ipatpatungpal ti LTO iti napasamak nga insidente a nagviral iti social media.
Immunan a nabigbig ti driver nga agtawen iti 33 ken residente ti Itogon, Benguet.
Maibasar iti inisyal nga imbestigasyon, agmanmaneho ti driver paturong iti amianan a paset ti Daang Suyo-Cervantes idiay Brgy. Uso, Suyo, Ilocos Sur idi nadungparna ti ubing a killaat a bimmalasiw iti kalsada kalpasan a bimmaba iti traysikel kadwana ti inana.
Gapu iti daytoy, naitaray ti ubing iti Ilocos Sur District Hospital ngem naideklara a dead on arrival.
Maibasar iti SCO, naibilin iti driver a sumango iti Intelligence and Investigation Division (IID) idiay
2/F LETAS Building, East Avenue, Quezon City, inton Enero 23, 2026, alas-2 ti malem.
Naibilin metlaeng iti driver a kasapulan a mangisumiter iti sworn statement ken agpalawag nu apay a saan a rumbeng a makasoan iti administrative case a Reckless Driving ken Improper Person to Operate a Motor Vehicle kasaruno ti napasamak nga insidente.
Kabayatanna, naipasidong iti alarm status ti pick-up truck nga inaramat ti driver ken temporaryo a nasuspendir ti lisensiya daytoy iti uneg ti 90 nga aldaw.
Nu saan a makapan ken makaisubmiter ti nasao a driver iti sworn statement iti naituding a petsa ket saanen a maipaayan iti gundaway a mangngegan ti bennegna ket ituloy ti LTO a mang-imbestigar maibasar kadagiti available documents.
