BAGUIO CITY- Nakemmeg ti dua a mapapati a kameng ti Communist Terrorist Group (CTG) iti naipatungpal a checkpoint operation sadiay Conner, Apayao idi Hunyo 12, 2022.
Nabigbig dagitoy a da “Ka Cris”, 36 anyos, tubo ti San Mateo, Isabela ken residente ti Bagong Pag-asa, Quezon City ken ni “KaZin”, 30 anyos, residente ti Dagat Dagatan, Barangay Longos, Malabon City.
Maibasar iti imbestigasyon, nakaawat ti Apayao PMFC ti awag seknan iti dua a maatap a miembro ti CTG a nakiangkas iti motorsiklo manipud Sitio Iyapan, Kabugao, Apayao paturong sadiay Conner-Tuguegarao Road.
Dagus a nangipatungpal dagiti otoridad ti checkpoint a nagresulta iti panakatiliw da “Ka Cris” ken “KaZin”.
Naduktalan a pinilit ken pinangtaan ti dua a CTG dagiti agtagikua kadagiti motorsiklo a nakiluganan dagitoy.
Naiturong dagiti suspek iti Conner MPS ken ditoy a nakumpirmar a sigud a rebelde dagitoy a simmukoda kas miembro ti Ilocos Cordillera Regional Committee (ICRC), Kilusang Larangang Guerilla (KLG) – North Abra.
Nakumpiskar manipud kadakuada ti nagduduma a kagawaan a mapapati nga ar-aramatenda iti panagrecruit kadagiti umili nga agbalin kas kameng ti CTG.
