Dua a lallaki ti inarestar dagiti otoridad iti naipatungpal a buy-bust operation idiay Barangay Pinsao Proper, Baguio City, 6:37 iti rabii idi September 22, 2024.
Pakairamanan daytoy da alyas “Jay” Asis, agtawen iti 30, ken ti kadwana a ni alyas “Mark”,maysa a menor de edad.
Agpada dagiti suspect a residente iti Dominican Mirador, Baguio City.
Nakumpiskar kadakuada ti dua a pekete ti maatap a shabu (methamphetamine) ken daduma pay a non-drug evidence pakairamanan ti maysa a genuine five hundred peso bill, kinse (15) a piraso iti boodle money, maysa a twenty peso bill, coins, dua a mobile phone, maysa a keychain,powerbank, camouflage belt bag,Luis Vuitton leather brown pouch, dua a lighter, dua nga helmet, ken maysa a metal scissor.
Karaman metlaeng a na-impound ti motor nga inaramat dagitoy.
Iti nasao nga operasyon, ni laeng alyas “Jay” ti puntirya a kemmegen dagiti otoridad ngem addaan daytoy iti kadwa idi indeliverna ti maatap nga iligal a droga rason a nakemmegda a dua.
Sigun kenni Police Lieutenant Laurence Linmayog, team leader iti Philippine National Police Drug Enforcement Group- Special Operations Unit-Cordillera, nabayag a minanmanada ni alyas “Jay”.
Dagiti suspects ket newly identified drug personalities.
Iti sabali a bangir, naikoordinar metten iti Department of Social Welfare and Development ken iti maseknan a prosecutor ti maipapan iti kaso ti menor de edad a suspect.
Iti agdama, addan iti kustodiya iti Philippine National Police Drug Enforcement Group-Special Operations Unit-Cordillera dagiti suspect ken dagiti non-drug evidence a nakumpiskar manipod kadakuada bayat a maisumitir iti Regional Forensic Unit-Cordillera dagiti drug-evidence para iti laboratory examination.
Ti nasao nga operasyon ket naipatungpal babaen iti nagtipon a pwersa dagiti kameng iti Philippine National Police Drug Enforcement Group-Special Operations Unit-Cordillera, ti Baguio City Police Office-Police Station 2, ken ti BCPO Mobile Patrol Unit, iti koordinasyon iti PDEA Land Transportation Interdiction Unit(LTIU), ken PDEA Regional Special Enforcement Team(RSET).//Bombo Rob Dominguez
