BAGUIO CITY – Agpatpataming paylaeng iti pagagasan ti maysa nga estudyante kalpasan a nabagsil iti likodna kabayatan ti kaaddana iti maysa a balay-paginuman sadiay Lower Magsaysay, Baguio City idi kalman.
Nabigbig daytoy a ni Roger Lagasi, 22-anyos, estudyante ken residente ti Pinsao Proper, Baguio City.
Nabigbig met ti nakemmeg a suspek a ni Earl Iban Ganga, 23-anyos, baro, awanan trabaho ken residente ti Balsigan, Baguio City nupay nakalibas ti dua a kakadwana.
Naduktalan iti imbestigasyon nga adda ti nagpatulong tapnu anawaen ti biktima dagiti suspek a mangririribuk iti entrance ti nasao a balay-paginuman.
Gapu iti daytoy, kinasarita ti biktima ti maysa kadagiti suspek ngem nagresulta laeng iti panagpangta ti maysa kadagiti suspek iti biktima.
Immadayo ti biktima tapnu saan a kumaro ti argumentoda ngem sinurot daytoy dagiti suspek ken sadiay a binugbog ken binagsolda ti biktima.
Dagus a naitaray iti pagagasan ti biktima bayat a naiyuman ti kaso iti pulisya ken iti panagresponde dagiti pulis ket nakemmegda ti suspek a ni Ganga bayat a nakalibas ti dua a kakadwa daytoy.
