Panggep ti Department of Information and Communications Technology (DICT)-Cordillera a maipaay ti free WiFi iti tunggal munisipyo ti rehiyon Cordillera inton tawen 2028.
Daytoy ket paset ti Free WiFi for all Program dagitoy.
Iti panakiuman ti Bombo Radyo kenni Engr. Alexander Badua, Engr. III ti Free WIFI For all Project Focal-Department of Information and Communications Technology – Cordillera, agarup walo gasut a sites iti rehiyon ti naipaayanda ti free wifi bayat a manamnama a manayonan pay daytoy inton sumaruno a bulan.
Sigun kenni Engr. Badua, dagiti prayoridad dagitoy nga ipaayan ti free wifi ket dagiti public places pakairamanan dagiti public schools, training institutions, state hospitals, municipal plazas ken daduma pay.
Inlawlawag ni Engr. Badua a ti rason ti nakapsot nga internet kadagiti free wifi sites ket gapu ta dakkel ti demand daytoy nangruna ket libre ken open daytoy iti publiko.
Nupay kasta, manamnama a marisut daytoy inton sumangpet iti siudad ti Bandwidth a nagtaud idiay California a mabalin a mangpapigsa iti internet connectivity.
Kabayatanna, impeksa ni Egr. Badua a parikot dagitoy ti kinakurang ti pondo para iti ad-adda a panakapapartak kuma ti isayangkatda Free WiFi for all Program iti rehiyon Cordillera ken maipaayan ti free wifi dagiti amin a barangay.
Ar-aramidenda met ti ahensiya ti kabaelanda tapno maiwayat dagiti fiber optic cable iti kabambantayan ti rehiyon.//Bombo Mera Pacpacan
