BAGUIO CITY – Isayangkat ti lokal a gobyerno ti Baguio ti maysa a fund drive ditoy siudad tapnu makaur-or iti pondo a maited iti Department of Education (DepEd) para iti blended learning dagiti estudyante.
Inaprobaran ti City Council ti resolusyon ni Councilor Betty Lourdes Tabanda para iti nasao a kampanya.
Nailanad iti resolusyon ti kiddaw a panangirugi ni Mayor Benjamin Magalong iti fund drive para kadagiti maikari nga estudyante iti siudad tapnu matulongan dagitoy iti panagadalda.
Kinunana a babaen iti nasao a fund drive ket matulongan dagiti nakukurapay ken maikari nga estudyante a makagatang wenno maaddaan iti gadgets dagitoy.
Maitunos ti addang ti lokal a gobyerno iti waragawag ti DepEd-Baguio Division nga agkurkurangda iti pondo ken saanda a maipaay ti amin a kagawaan a kasapulan iti panakaimplementar ti blended learning.
