Inaprubaranen ti House of Representatives of the Philippines iti 3rd ken final reading ti House Bill 8418 a mangipaay iti otoridad kenni President Ferdinand “Bongbong” Marcos Jr. a temporaryo a mangibaba wenno mangsuspindir iti excise tax kadagiti produkto a petrolyo tunggal mapasaran ti krisis iti ekonomiya ti pagilian.
Naaprubaran daytoy babaen iti botos a 247 a pabor, tallo a kontra, ken zero abstention.
Karaman iti saan nga immanamong iti nasao a singasing ket da Kabataan Partylist Rep. Renee Co, Gabriela Partylist Rep. Sara Elago, ken ACT Teachers Partylist Antonio Tinio.
Iti sidung ti nasao a gakat, mabalin a kissayan ti presidente ti aginga P10 tunggal litro nga excise tax iti gasolina ken P6 iti diesel apaman a ngumato ti presyo daytoy iti $80 tunggal bariles iti world market wenno nu maideklara ti national emergency ken kalamidad iti pagilian.
Mabalin met nga aramaten ti presidente ti otoridad daytoy a mangkissay ti excise tax ti produkto a petrolyo agingga Disyembre 31, 2028. //Bombo Karen Sapirao
