Naisumitirin iti Constitutional Court ti impeachment complaint kontra kenni South Korean President Yoon Suk Yeol kalpasan a naimpeach daytoy babaen iti panagbutos dagiti mammanday-linteg sadiay.
Daytoy ket kalpasan ti panangideklarana iti emergency martial law idi Disyembre a tres, iti agdama a tawen.
Iti pannakiuman ti Bombo Radyo kenni Roel Toquero-Bombo International News Correspondent idiay South Korea, kinunana a naiwaragawag sadiay iti oras ti alas singko y media ita nga aldaw ti resulta no sadino na-impeach ti nasao a presidente.
Sigun kenkuana manipud kadagati tallo gasut a mammanday-linteg sadiay, 204 kadagitoy ti nagbutos, 85 ti saan nga immannamong, tallo ti abstained ken walo ti nullified.
Gapu iti dayta, automatic daytoy a nasuspindir iti takemna kas presidente iti nasao a pagilian.
Nupay kasta, posible a maisubli daytoy iti pwestona depende iti resulta manipud iti constitutional court kalpasan ti innem a bulan a pannakaadal daytoy ngem no maikkat met daytoy ket maangay ti special election kalpasan ti innem a pulo nga aldaw a pannakaideklarana.
Iti agdama, temporaryo paylaeng a nadutukan ni Prime Minister Han Duck-soo a mangidaulo iti nasao a pagilian.
Kabayatanna, inyebkas pay ni Toquero a dakkel ti nagbalin nga epekto ti pannakaideklara ti martial law sadiay kas iti panagbaba ti currencies kontra iti kuarta manipud kadagiti dadduma a pagilian.
Malaksid iti dayta, bimmasit payen dagiti investors agsipud ta nagwithdraw dagitoy.
Iti sabali a bangir nagpalagip met daytoy kadagiti padana nga Overseas filipino workers sadiay nga isagana dagiti papeles ken passports dagitoy tapno iti kanito a kumaro ti sitwasyon sadiay ket adda a nakasaganada.
