Mapadpadaanan ti inagurasyon ni United States President-elect Donald Trump inton bigat.
Iti pannakiuman ti Bombo Radyo kenni Delfrado Villanueva Jr.,Bombo International News Correspondent sadiay United States of America,kinunana a maipatungpal ti inagurasyon iti uneg ti United States Capitol gapu paylaeng iti nalam-ek a klima.
Manamnama met a pasetan daytoy da sigud nga uppat nga United States President Bill Clinton, George W. Bush, Barack Obama ken President Joe Biden .
Pasetan metlaeng daytoy da Vice President Kamala Harris, tech CEO’s a pakairamanan da Meta’s Mark Zuckerberg, Amazon’s Jeff Bezos, Tesla’s Elon Musk, Apple’s Tim Cook, TikTok’s Shou Chew ken Google’s Sundar Pichai ken dadduma pay.
Nupay kasta, saan met a makipaset ditoy da sigud a first lady Michelle Obama ken sigud a House Speaker Nancy Pelosi.
Kabayatanna, impetteng ni Villanueva Jr., a nakasagana metten dagiti amin a police personnels sadiay para iti pannakaipasigurado ti linak ken kappia bayat ti inagurasyon.
Naituding a maangay ditoy ti inaugural speech ni President-elect Trump, oath taking ceremony ken dadduma pay.
Iti sabali a bangir, maysa metlaeng a maipatungpal bayat ti panagtakem ti nasao a President-elect ket ti pannakaarestar dagiti illegal immigrants sadiay a dumanon iti agarup 2 million nga indibidual.
Sigun kenni Villanueva Jr., umuna a maarestar ditoy ket dagiti addaan iti nadadagsen a kaso.
Inlawlawagna a dagiti maarestar ken maideport nga illegal immigrants ket posible a marigatan danton nga agsubli manen iti nasao a pagilian.
