Manamnama a maiwaragawag iti mabiit dagiti mangbukel iti independent body a mangimbestigar kadagiti naanomalyaan ken ghost flood control projects.
Sigun kenni President Ferdinand Marcos Jr.,buklen ti independent body ti abogado wenno justice, imbestigador, ken forensic accountant a makitrinnabaho kadagiti amin nga ahensya iti gobyerno nangruna iti National Bureau of Investigation para iti imbestigasyon ken iti Commission on Audit para iti impormasyon.
Ti independent body sigun iti presidente ket maaddaan iti bileg a napateg para iti panakaala iti konklusyon mainaig kadagiti nasao a proyekto a maatap a wagas iti panakapasamak iti korapsyon.
Mabalinda nga imbestigaran dagiti siasinoman a karaman iti anomalya.
Maaddaan dagitoy iti recommendatory role ken manamnama a mangisumitir kadagiti maduktalanda iti Department of Justice (DOJ) wenno iti Office of the Ombudsman tapno maipila dagiti kaskenan a kaso.
