BAGUIO CITY – Maaw-awis dagiti interesado nga agbalin a benepisyaryo ti Pambansang Pabahay Para sa Pilipino Program a makipaset iti maangay a housing fair idiay Porta Vaga Mall, Baguio City inton October 9 agingga October 11.
Iti interview ti Bombo Radyo kenni Karen Poligrates, iti Department of Human Settlements and Urban Development – Cordillera, adda ti booths a maisagana para kadagiti nagduduma a programa ti ahensiya babaen iti koordinasyonda kadagiti dadduma pay a key shelter agencies kas iti PagIBIG Fund, National Housing Authority, Human Settlements Adjudication Commission, Social Housing Finance Corporation, ken ti National Home Mortgage Finance Corporation.
Ti Pambansang Pabahay Para sa Pilipino ket maysa kadagiti flagship programs ni President Ferdinand Marcos Jr. nu sadino panggepna a tulungan dagiti Pilipino nangruna dagiti saan a makabael a mangaramid weno gumatang iti bukodda a pagtaengan.
Inlawlawag ni Poligrates a daytoy ket maysa a loan program nu sadino, minimal laeng ti bayadan dagiti benepisyaryo gapu ta mangipaay iti interest subsidy ti gobyerno para kadakuada.
Sigun kenni Poligrates, ipangpangruna ti nasao a programa dagiti under priviledged nga umili pakairamanan dagiti informal sector families, ken dagiti low income earners.
Innayon ti opisyal a mabalin metlaeng nga agaplikar dagiti empleyado ti gobyerno iti nasao a programa.
Nupay kasta, dinakamat ni Poligrates a dumalan metlaeng dagiti aplikante iti screening nu sadino, kangrunaan a pakaibasaran tapno mairaman dagitoy kas benepisyaryo ket masapol a first time home ownerda.
