Agbalballakad ita ni Itogon Mayor Bernard Waclin kadagiti residente ti Itogon nga ipangpangrunada ti seguridad dagitoy nangnangruna ita a panagtutudo.
Kagiddan dayta, inbilinna iti Itogon Municipal Disaster Risk Reduction and Management Council (MDRRMC) nga ituloyda a palagipan dagiti small-scale mining groups tapno suspenderenda pay dagiti operationda tunggal agtudo tapno masigurado ti seguridad dagitoy.
Sigun kenkuana, adadda gamin a delikado dagitoy tunggal panagtutudo gapu iti pangta ti landslides, panagcollapse dagiti tunnel, ken panaglayos.
Nagbalakad metlaeng ni Mayor Waclin kadagiti amin a parentes nga agridamda ken kitaenda ti sitwasyon sakbay a palubosanda dagiti annakda a mapan iti pagadalan adda man wenno awan ti suspension a naipaulog.
Impettengna a nagduduma ti sitwasyon kadagiti nagduduma a barangay no sadino adda dagiti makapaspasar iti nakarkaro a risgo nu dagiti dadduma.
Sigun kenkuana, dagiti parentes ti umuna a makin-ammo ti sitwasyon kadagiti bukodda a lugat isu’t gapunna a kitaenda dagiti dalan nu natalged pay laeng a sumrek dagiti annakda iti pagadalan.
Inyunayunay ni Mayor Waclin nga agtaltalinaed a prayoridad ti lokal a gobyerno ti Itogon ti seguridad dagiti umili sadiay.
Guyguyuguyenna met amin a residente sadiay nga agbalin dagitoy a naridam ken agtulnogda kadagiti amin a bilin ti MDRRMC ken dadduma pay nga ahensya ti gobyerno. //bombokaren.c.sapirao
