BAGUIO CITY – Inyusuat ti Department of Agriculture (DA)-Cordillera ti “KADIWA Direct Connect” kas panangsurportarda kadagiti mannalon ti nateng ken kadagiti buyers ti nateng a maitunos iti “Kadiwa ni Ani at Kita Program” ni Agriculture Secretary William Dar.
Sigun iti DA-Cordillera, ti KADIWA Direct Connect ket maysa a platform nga inorganisada tapnu maasistaran ken maikonektar dagiti mannalon iti panagilako dagitoy iti natnatengda ken dadduma nga agri-products kadagiti direkta a buyers ken vice versa kagiddan ti enhanced community quarantine iti Luzon.
Karaman kadagiti nasao a direct buyers dagiti local government units, organized Kadiwa ni Ani at Kita stores, private sectors ken dadduma a related markets.
Nangipaay ti ahensia iti direct connect lines kas iti 0912-188-6904, 0910-278-1667 ken 0905-151-2691 para kadagiti mannalon iti Benguet, Ifugao ken Mountain Province.
Maikalkalikagum ti panangisumitir ti maysa a mannalon iti naganna, address, nateng a lakona, kaadu ti nateng, aldaw a naapit ken nai-deliver ti nateng.
Maikalkalikagum met ti panangited ti maysa a buyer iti naganna, address, kaadu ti gatangenna a nateng, delivery schedule ken delivery sites.
