Balligi a napasilawan ti rose garden fountain lights sadiay Rose Garden, Burnham Park kalpasan ti sumagmamano a tawen a saan dagitoy a naaramat gapu iti panakadadael dagitoy.
Iti panakiuman iti Bombo Radyo kenni Atty. Rhenan Diwas, dadaulo ti City Environment and Parks Management Office, balligi ti pannakaisimpa iti fountain lights gapu iti partnership ti nasao nga opisina iti Mabelline Landscaping Services nga idadauluan ni Maribel Chagwaten, ti proprietor ti Panagbenga Market Encounter iti Baguio City.
Impeksa pay ni Diwas a ti nadakamat nga aktibidad ket saan laeng a wagas tapno mapapintas ti market nu di ket tapnu mangipaay iti lugar a mabalin a pagpasyaran dagiti agpapamilya.
Mainaig iti dayta, nalaos met ti panagyaman ni Maribel Chagwaten gapu iti impaay ti lokal a gobyerno ti siudad a talek kenkuana para iti pannakaisimpa ken panakapapintas dagiti fountain lights idiay iti nadakamat a parke.
Namnamaen ti opsiyal a maragsakan dagiti tattao iti panakapapintas ti parke ken ti panakanayon dagiti nagduduma a mabuya sadiay kas kadagiti koi fishes, fountain lights, ken dagiti naimula a roses.
Kagiddan dayta, kiniddaw ni Chagwaten kadagiti umili ken turista iti siyudad ti Baguio a makitinnulongdaiti panakamintinir ti kinadalus ken kinasimpa ti aglawlaw saan laeng nga iti paset ti fountain lights nu di ket iti intero a Burnham Park.//Bombo Genzel Depayso
