![](https://img.bomboradyo.com/baguio/2024/07/HAND-GRENADE-EXPLOSION.jpg)
BAGUIO CITY – Agtultuloy ti imbestigasyon dagiti maseknan nga otoridad tapno mabigbig dagiti suspek a nagtaudan ti maatap nga hand grenade a bimbak idiay Rizal Street, Zone 6, Bangued, Abra.
Iti exclusive interview ti Bombo Radyo kenni PMaj. Lorenz Paul Claveria, Acting Chief of Police iti Bangued Municipal Police Station, napasamak daytoy iti alas dos ti parbangon iti pagtaengan ni Perfecto Bolos Cardenas.
Maibasar iti inisyal nga imbestigasyon, pasado alas dos ti parbangon idi lmmabas ti dua a saan a nabigbig nga indibidual a nakalugan ti motorsiklo nu sadino idi limmabasda iti balay ti biktima ket adda ti kellaat a bimtak.
Iti panakiuman met dagiti otoridad kenni Cardenas, kinunana nga awan ti nakitana a naidumduma iti aglawlawna idi napalpalabas nga aldaw.
Awan ti nadangran wenno pimmusay a residente ngem nadadael iti sumagmamano a paset ti pagtaengan ni Cardenas.
Ti bimtak ket maysa a klase ti ati-grenade.
Iti agdama, dukduktalen dagiti otoridad ti motibo iti nasao a panagbettak.
Agtultuloy ti panakikoordinarda nangruna kadagiti residente nga addaan ti CCTV footage tapno maduktalan ti posible a nagturongan dagiti suspek.