Inarestar dagiti otoridad ti babae a car agent ken ti maysa a lalaki a sigud a police officer sadiay Quezon City idi January 31, 2026.
Binigbig dagiti otoridad ti car agent kas person of interest iti ipupusay ni Police Senior Master Sergeant Diane Marie Mollenido ken ti anakna a lalaki.
Mainaig iti dayta, narekober ti Regional Highway Patrol Unit Cordillera Administrative Region iti Baguio City ti lugan a kukua ti napapatay a ni PSMS. Mollenido.
Maatap nga intaray daytoy dagiti suspek no sadino, maysa ditoy ti asawa ti biktima.
Maipalagip a nakisinnarak ni PSMS. Mollenido iti maysa a buyer ti lugan, kadwana ti anakna a lalaki idi January 16.
Panggepna nga ilako ti lugan dagitoy iti P450,000.
Nupay kasta, nagtungpal daytoy iti insidente a nangitunda iti ipupusay dagiti agina ken pannakatakaw ti lugan nga ilaklakoda.
Naudi a nakita dagiti agina sadiay Novaliches, Quezon City idi Jan. 16 ken na-ireportda a missing idi Jan. 19.
Immuna a nasarakan ti bangkay ni PSMS. Mollenido iti Bulacan creek sadiay Barangay Dulong Malabon, Bulacan, idi Jan. 24.
Nasarakan met ti agruprupsa a bangkay ti agtawen iti 8 nga anakna iti masya a calamansi farm sadiay Maluid, Victoria Tarlac idi Huebes, Jan. 29, 2026.
Nabungon daytoy iti tape ken naikabil iti plastic garbage bag.
Agtultuloy paylaeng ti imbestigasion dagiti otoridad seknan iti daytoy.
