BAGUIO CITY – Supsuportaran ti dua a kandidato iti kina-mayor iti Baguio City ti maisaksad nga otonomiya iti rehiyon Cordillera.
Iti naangay a forum, saan a nakadar-ay dagiti kandidato iti kina-gobernador manipud iti innem a probinsia iti rehion.
Dua laeng a kandidato ti nangipaay iti takderna seknan iti Regional Autonomy pakairaman ti sigud a mayor ti siudad a ni Atty. Mauricio Domogon ken ti agdama a mayor a ni Benjamin Magalong.
Sigun kenni Magalong, nasken nga adda ti transformation iti tunggal lokal a gobierno tapno magun-od ti matartarigagayan nga otonomiya.
Inayonna a nasken nga agbalbaliw mismo dagiti politiko nu sadino nasaysayaat nu agaksion saan laeng nga iti sao.
Sigun met kenni Domogan, napateg ti otonomiya gaputa pagkaykaysaenna amin a tribu ken dagiti nagbalinen nga umili iti Cordillera.
Inayonna pay a babaen iti otonomiya ket maipaay kadagiti pudpudno nga ancestral claimants dagiti lote dagitoy kas ti Baguio City.
Maibasar iti kaudian a panagadal, manaynayon ti bilang dagiti umili iti siudad a makaaw-awat iti pudno a kaipapanan ti otonomiya.
