Nasarakan ti bangkay ti maysa a kaiyanak a maladaga a lalaki kalpasan a mapapati nga intaray ti maysa nga aso manipud iti maysa a bakante a lote sadiay Purok Masagana, Brgy. San Isidro, General Santos City itay kanikadua.
Maibasar iti imbestigasyon dagiti otoridad, mapapati a naibelleng ti nasao a maladaga iti nasao a lote no sadino nabalkot daytoy iti tela ken naikarga iti maysa nga eco-bag.
Nupay kasta, nasarakan daytoy ti aso rason nga intarayna ti bangkay ti nasao a maladaga.
Maatap met a naipalaglag ti nasao a maladaga gaputa ta maibasar iti itsura daytoy ket mapapati a saan pay a siyam a bulan ken adda metlaeng ti nasarakan nga agas a posible a naaramat iti abortion.
Sigun kenni PMaj. Ivan Charles Abastillas, Commander, PS1-GenSan Police Office, nakitada dagiti unprescribed pills rason nga inpakumpirada daytoy iti attending physician.
Iti agdama, addan iti maysa a punerarya ti bangkay ti nasao a maladaga, bayat a sapsapulen itan dagiti otoridad ti nanang daytoy.
Courtesy: Ynffad Senap/ Almark Mones, PS1-General Santos City Police
