Inlawlawag ni Assistant Majority Leader ken Lanao del Sur Rep. Zia Alonto Adiong a ti pannakairaman ni Mamamayang Liberal (ML) Representative-elect Leila de Lima iti House prosecution panel para iti masungad nga impeachment trial ni Vice President Sara Duterte ket saan a mangpataud iti aniaman a panagsusupiat ken patibkerenna ketdi ti kaso.
Innayonna a mabalin met nga agpatulong iti lower chamber kadagiti external legal experts, nangruna dagiti nagparang a kameng ti prosecution kabayatan ti impeachment trial idi tawen 2012 ni Chief Justice Renato Corona. ‘
Kinuna pay ni Adiong a makatulong ni De Lima a mangidarum iti impeachment charges mainaig iti mapapati a “brutal drug war” ti sigud nga administrasion.
Ti dakdakamaten ni Adiong ket ti Article 5 ti impeachment complaint, a mangak-akusar iti bise preisdente a nangaramid ti krimen pakairamanan ti “murder” ken “conspiracy to commit murder.”
Ti article ket nasuportan babaen ti testimonial evidence manipod kenni Arturo Lascañas, maysa a self-confessed hitman ti Davao Death Squad (DDS).
