BAGUIO CITY – Manarimaan ti panakaipasdek ti poste para iti manamnama a panakaibangon ti Y-shape overpass iti nagbaetan ti km4 ken km5 idiay La Trinidad, Benguet kagiddan ti panakapabaro ti kalsada sadiay.
Iti interview ti Bombo Radyo kenni La Trinidad Mayor Romeo Salda, namnamaenda a maileppas ti overpass inton Disyembre iti agdama a tawen.
Kinunana a bambantayan da ti panawen ti panagtutudo para iti timing ti panagtrabaho dagiti contractors ken magun-od ti puntirya dagitoy.
Namnamaen da met a mapondoan ti panakaibangon ti P25-million a Y-shape overpass pakairamanan ti overpass iti sango ti maysa kadagiti kadaklan a grocery store idiay km4, La Trinidad, Benguet.
Mainaig iti dayta, kinuna ni Mayor Salda a mapaspasaran ladta ti nailet a gunay ti trapiko partikular iti rush hour.
