Umap-apela ken kiddaw dagiti masahista iti siudad ti Baguio a maipaayan dagitoy iti pagpwestoan wenno pagiyanan tapno agbalin a legal ti operasyonda ken saanda nga agpatpatangken iti ulo.
Iti pakaiuman ti Bombo Radyo kenni Julie Sarsagat, massage therapist iti siudad ti Baguio, aklonenna a saan a legal ti ar-aramidenda kadagiti parke ngem daytoy laeng ti maysa a wagas a pagbiaganda.
Inlawlawag ni Sarsagat nga iti laksid dagiti ado a panangiparit dagiti panakabagi ti linteg ket agtultuloy ladta dagitoy gapu ta dakkel ti pamastrekan iti panagbalin a masahista kadagiti parke nu idilig kadagiti Spa.
Kinuna ni Sarsagat, nalpasen met a naipatungpal ti profiling kadagitoy a masahista iti Burnham Park, rason a kayatda nga imbestigaran ti napasamak kadagiti papeles nga insubmitirda kas iti health certificate, massage certificate, drug test ken daduma pay.
Maipalagip nga idi napalabas, naipaayan iti maysa a bulan dagiti masahista nga agbirok iti lugar a kayatda a pag-iyanan ngem ti kayatda ket ti sentro ti Burnham a saan a rumbeng gapu ta agbalbalin dagitoy nga “eyesore.”
Nupay kasta, kinuna ni Sarsagat a saanda met a pilien ti pag-iyananda basta adda ti maituding a pangipatulangda iti operasyon dagitoy.
Innayon ni Sarsagat a kabayatan ti profiling, dumanon laeng iti agarup innem a pulo ti nakipaset iti daytoy ngem immado ti bilang dagitoy nga agop-operate a dumanon iti nasurok sangagasut iti agdama.
Iti panagado dagitoy a masahista, impeksa ni Sarsagat a saanda met a makontrol dagitoy.
Saan met nga inlibak ti masahista a nagtaudda iti sabali a lugar ken nagnaedda iti siudad ti Baguio.
Nupay kasta, iti panagbalin dagitoy a botante iti siudad ket karbenganda met nga agbirok iti pagbiaganda kas iti panagbalin a masahista.
Kabayatanna, kiddaw ni Sarsagat kadagiti padana a masahista nga agbalin dagitoy a transparent kadagiti presyo ti serbisyoda.
Ti panangibagada a dagus kadagiti rate dagitoy ken saan a kalpasan ti panagmasaheda nu diket mapagtalinaed ti imahe dagitoy kas masahista iti Summer Capital of the Philippines.
